環球信貸集團

【定期有60厘,好做過財仔】

報紙新聞話,美國加息加得咁開心,阿根廷都唔執輸喎,狠加息至60厘,誓要爬過美國火車頭,成為高息貨幣,咁先至叫型仔。財仔最多都係收60厘回報,計埋燈油火蠟?回報當然少過60厘啦!我地拎錢去阿根廷定期仲發過做財務公司呀!

 

條數係咪咁計先?睇多兩眼! 喂! 原來阿根廷叫緊救命,需要江湖救急。實情我巨鯨都有一棵惻隱之心,好想去幫下手。但係……你知啦……長貧難顧家麻,幫手都要睇情況架。一陣間俾佢拉埋落水,浸親我仲得掂既!

 

觀察下基本數據都要既,平時我地借錢俾朋友都要睇佢還唔還到錢家麻,唔係送俾佢家麻。望一望個披索對美金匯價,真係 OH MY GOD! 嚇到寶寶都大叫。貨幣貶值既速度,仲快過杯雪糕溶既速度,咁點買啫。2014年至今阿根廷披索貶值左四倍,60厘都死啦,買堆廢紙番黎貼牆紙呀!第日我拎箱銀紙,去買包紙巾,不如我直接用銀紙抺嘴喇,起碼可以抺多幾百次。

 

點解政府要咁樣玩法呢? 好好地好似香港既港元同美金掛鈎唔好咩!要有穩定既匯價,先至會有商家係當地投資家麻。鬼唔唔知呀媽係女人咩? 小朋友細細個都被教育要尊敬父母架啦。有幾多人做得到先得架,紙上談兵係人都識啦!而家問題係,阿根廷無美金頂住個匯價呀麻。匯價咁走法,D商家又話撈唔掂,要換番美金走人,巿民又話要唱美金去旅行(當地居民邊有錢去旅行啫)。個個都要美金,你估美金印出黎架?你又估中呀,美金真係印出黎,只不過唔係阿根廷印得到之麻,美國先可以印美金。

 

大佬呀! 美國印到美金,叫美國幫下手咪得咯,大家樓上樓下,唔係唔幫手呀?呢鑊野巨鯨可以答下嘴啦!美國幫阿根廷就出奇蛋咯。整個量化寛鬆既部署,就係等呢一日。美國火車頭係08年個車轆卡住左,唔識郁就係人都知架啦!美國做唔到最強既貨幣咁點算? 美國唔洗最強既! 你地破哂產投降就得架啦!

 

量化寛鬆咪就係美國近十年既新武器咯。平息借美金俾大機構將錢存放係不同既高息貨幣做套利,再經過銀行體系既工序,當然借哂出去啦。問題就黎啦,而家美國加息,比著你會點做?緊係攞番D外幣,兌番做美金,班師回朝還番俾美國啦!面對排山倒海既兌換,銀包無哂美金,就出事咯。

 

咁阿根廷個情境咁嚴峻,仲有冇得救? 巨鯨真心果句,如果輕輕刷傷流血就有得救,搵人貼塊膠布就搞掂。而家係美國大佬要搵佢做炮灰麻,打擊全球投資者信心,令全球資金回流美國,令到弱國貨幣骨牌式崩盤,阿根廷係係適當人選,命中注定成為第一張骨牌。阿根廷叫救命係一早可預期得到,懶債次數榜上有名,但國際貨幣基金組織唔單只坐視不理,阿根廷叫救命都仲話要考慮下。考慮下這個答案真係可圈可點,作為一個聰明既投資者,司馬昭之心,路人皆知。

 

講番股票,點解會拎財仔黎講,因為巨鯨一直都留意財務上巿公司,當然唔會太大隻。我估會有朋友會問,乜而家細價股仲有得炒?首先要講番清楚,監官機構係嚴打殻股及財技股,而唔係細價股,所以做實業既細價股是可以。順便回答埋讀者既下一條問題,何解一定係細價股,因為細價股領域才係高手較量既地方。

 

如果你都是高手,可以一齊研究下環球信貸集團(1669)。一來,我個人認為這間公司業績不錯,二來,行家同我講,這間財務公司單單都是做大單,唔做散客,是一間有實力的公司。實業股每年都賺錢係基本,派息都是必須的,可能大家會覺得我要求好似有點高,但我們做投資,就是要尋找一隻好馬,又要馬兒好,又要馬兒不吃草。實際上,我要求不是太高,因為近兩年派息都有減少。為何我會睇中佢呢? 除了股價殘之外,就是股價太殘。整間公司巿值3.3億港元,巿盈率5.25倍,派息率約5.9%, 2014年上巿價1.35港元,而在報0.83港元,低招股價約40%,係邊到搵?

 

不過平還平,睇番四周既環境,戰火綿綿,七國咁亂,而家美國又話貿易唔公平,如果世界貿易組織處事對美國不公平,將會退出世貿。跟住黎緊美國又話要發動史上最大型的軍演,動作多多。想個巿場氣氛都難,大家有眼睇,金管局接港元接都接到手軟,期望個巿會上升,除非美國換總統啦! 另外8月28日剛剛公布業績,純利約2821萬,增長13.5%,淨息差微增至12.3%,環球信貸集團可先放入觀察名單。等待大巿企穩才考慮。上望空間不多,預期股價不會大幅波動,純粹以收息股看待。

 

>>>收聽巨鯨與你同行節目<<<

重點文章:
【貿易戰的商機】

美元貨幣政策非想像那麼簡單

 

[免費]投資講座

Scroll to Top