低估值股份開始謹慎地入場

最近這數個星期,有幾個重大宏觀經濟的因素,左右住港股的未來數月走向。當中包括中美貿易局勢持續緊張,美國接近11月中期選舉,英國脫歐動態等。在阿根廷方面,央行面對財政問題之下,提高利率至60%,以及向IMF尋求資金援助,似乎都無法制衡當地貨幣的貶值。中國方面,雖然當局推出逆週期因子,以及相關打擊沽空人仔嘅政策,試圖改變市場一面倒貶值的看法。但是,一日貿易戰持續拉鋸,人行一日都有心想人仔緩慢貶值,以提振出口數字。過往歷史話比我地知,如果人民幣貶值,中資股(尤其係中資金融股、內房股、航空股)將會受壓。2015年的人民幣「8.11」匯改就係其中一個例子。而美國方面,中期選舉選舉即將舉行,特朗普面對彈劾危機,可能在貿易政策及對其他國家的經濟制裁上加大力度;利率期貨顯示,聯儲局在9月及12月的FOMC會議上,有很大可能宣佈加息,股友要留意屆時資金流向。
美股方面,道指及標普500指數繼續強勢,納指反而走弱。但當中不乏優質股份值得留意。Adobe(NASDAQ: ADBE)及Microsoft(NASDAQ: MSFT) 最近改變一直沿用的收入模式。幾年前係升級(upgrade) 一次軟件系統收一次錢,依家係每年收費。大型企業希望一直沿用優質軟件之下,焗住繳交。所以這兩家知名企業嘅收入現金流有望改善。而Adobe依家更加開始左人工智能業務,以及進行電子商業平台(e-commerce platform),業務前景不俗。
而香港呢邊,恆指上週多次試26800的前底,市場開始有聲音提出,恆指高位跌差唔多2成,符合學術上的「熊市」走勢。但筆者認為,恆指跌至呢個水平,個別股份估值變得吸引,在嚴選個股的原則下,可以博技術性反彈。選股包括較早前推介嘅綠葉製藥 (02186)亦有業務發展。9月初的公告披露,旗下微球LY01005啟動中國三期臨床試驗。基本因素冇惡化之下,PE跌至19倍左右實屬吸引,但要小心股價是否有機會跌穿早前底部$6.5位置。而萬洲國際 (00288)受貿易戰及非洲豬瘟消息拖累,股價一直探底,PE跌至9倍,但5.5-6.5平台位置似乎企得幾穩。而這兩項不利因素相信都有解決嘅一日,息率超過4.5%亦屬吸引,初步目標價$7,止蝕位$5.5。
最近新股市場保持暢旺,最近有美團正在招股,海底撈亦密鑼緊鼓籌備上市。
內地最大的團購平台「美團」及餐廳點評平台「大眾點評」,其實都係內地好興嘅手機應用程式,喺內地嘅後生仔女平時食野,都中意用美團搜尋餐廳,同埋攞折扣,以至訂位,用落都非常方便。招股書顯示,喺2017年,美團嘅手機平台完成嘅交易總數超過58億,金額都有3570億人仔。全國用戶有3.1億,活躍用戶都有440億。但是,公司到目前為止都係唔賺錢嘅。而美團首四月經營虧損更加擴大。據文件顯示,公司今年首四月收入為158.24億元人民幣(下同),按年增94.89%,經營虧損由去年7.69億元擴大至25.26億元。一間公司,如果暫時睇唔到將收入實現成盈利嘅機會,暫時都不適宜投資。第二,公司都有一個外賣應用程式「美團外賣」,雖然市佔超過50%,但面對百度外賣同餓了麼不斷燒錢,競爭難免;而共享單車程式「摩拜單車」都係公司一個幾大嘅隱憂。美團喺今年4月,以27億美元全資收購「摩拜單車」。但其平均每日虧損逾1500萬,海外擴展亦不太順利。除此之外,公司係第二隻來港上市嘅同股不同權股份,值得關注呢個做法對小股東嘅利益影響情況。
反而海底撈較為值博,因為公司盈利前景較為確定。今年上半年,海底撈實現營收人民幣 73.42 億元,比上年同期的 47.56 億元增長 超過54%。業績的高速增長,與海底撈正提速開店擴張有關。海底撈全國門店數量由去年底的 273 間增至 362 間,今年上半年新增 71 家門店,且大多數新增門店集中二三線城市。

(戰友:高翔)

[免費]投資講座

Leave a Comment

Your email address will not be published. Required fields are marked *

This site uses Akismet to reduce spam. Learn how your comment data is processed.

Scroll to Top